kiliti ng Diyos...: MARIA TULONG NG MGA KRISTIYANO: Reflection for the Feast of Mary Help of Christians

Martes, Mayo 22, 2007

MARIA TULONG NG MGA KRISTIYANO: Reflection for the Feast of Mary Help of Christians - May 24, 2007

Mayroong isang kuwento na minsan daw sa langit ay naglalakad ang Panginoong Hesus at nakakita siya ng mga di kilalang kaluluwa na gumagala sa Kanyang kaharian. Agad niyang tinawag si San Pedro upang tanungin kung sino ang mga bagong "migrants" na iyon. Walang masabi si San Pedro kaya't katakot-takot na sermon ang inabot niya sa Panginoon. "HIndi ba sabi ko na sa iyong isarado mong mabuti ang pinto upang walang makakapasok dito na hindi natin nalalaman?" Sabi ni Hesus. Tugon ni San Pedro: "Sinasarado ko naman po... kaya lang ang nanay ninyo binubuksan naman ang bintana at doon ipinupuslit ang mga migranteng ito!" hehehe... Marahil isang kuwento lamang ngunit kapupulutan natin ng aral tungkol sa ating Mahal na Birhen. Tunay ngang siya ay "tulong ng mga Kristiyano" o "Help of Christians". Ang kasaysayan ang ating patunay na si Maria ay laging tumutugon sa pangangailanan ng Simbahan. October 7, 1571 ng magapi ng mga mandirigmang Kristiyano ang mga turko sa malamilagrong "Battle of Lepanto. May 24, 1814 ng nakalaya si Pope Pius VII sa pagkakabihag ni Napoleon at nawala ang pagtatangkang sirain ang Simbahan. Noong panahon ni Don Bosco (1815-1888) ay talamak at hayagan ang pagbatikos sa Simbahan ng mga "Anti-clericals". Lahat ng pagsubok na yan ay nalagpasan ng Simbahan sa pamamagitan ng pamimintuho at debosyon sa kanya. Kaya nga't hindi nagdalawang isip si Don Bosco upang kunin siyang patron ng kanyang gawain. Hanggang ngayon ay patuloy ang paggawa ni Maria ng himala at namamagitan siya sa pangangailangan ng Simbahan. Marami pa rin ang sumisira at tumutuligsa sa ating pananampalataya. Hingin natin ang makapangyarihang pamamagitan (intercession) ni Maria... ang Tulong ng mga Kristiyano!

1 komento:

Hindi-nagpakilala ayon kay ...: hello po father! happy feast of MHC in advance!
congratulations po for ur effort to reach out to the hearts of young people through creating youth-friendly reflections... hence, the title "pro-youth gospel reflections"...
truly indeed, Mary is our Mother and our help, who never fails to pray for us and protect us... uhmmm, pero father, hindi po kya isipin ng ibang babasa dun s story n nbanggit niyo eh, mas mataas pa si Mama Mary ksa k Jesus, kc nkkpgppsok siya ng mga souls s heaven ng hindi niya nalalaman? hehehe... naisip ko lng po un, kc naaalala ko po before eh, nrnig ko from somewhere n iwasan pong gmitin ung story n un kc it only gives other people wrong notion about our Blessed Mother, na she's the one who answers our needs and hindi c God... father wag nyo po masamain ah... gusto ko lng po ishare ung pananaw ko dun s reflection... what do u think po?
take care po always and God bless!; Mayo 22, 2007 nang 7:42 PM

Mag-post ng isang Komento

Mag-subscribe sa: I-post ang Mga Komento (Atom)

MAIKLING KATESISMO PARA SA TAON NG MGA KABATAAN

MAIKLING KATESISMO: ANG SAKRAMENTO NG BINYAG

1. ANO ANG DAPAT NATING PANIWALAAN (CREED)

1.1. Sino ang nagtatag ng Sakramento ng Binyag? Si Kristo ang nagtatag ng Sakramento ng Binyag, at siya rin ang nag-utos sa mga apostol na binyagan ang lahat ng tao. (Mt. 28:19. Mk. 16:15-16) Sa bisa ng utos na ito, ang mga apostol at mga disipulo ni Kristo ay nagsiyao sa iba’t ibang panig ng daigdig upang mangaral at binyagan ang mga tao.

1.2. Bakit unang sakramento ang binyag? Ang Binyag ang unang sakramento sapagkat iyon ang sakramento ng ating kapanganakan sa pang-Diyos na buhay.

1.3. Ano ang pang-Diyos na buhay? Ang pang-Diyos na buhay ay ang pakikibahagi sa buhay ng Diyos at ang pananatili ng Diyos Ama, Anak at Espiritu Santo na nabubuhay sa atin.

1.4. Sino ang nagbibigay ng pang-Diyos na buhay sa atin at saan niya ito ibinibigay? Si Jesus ang nagbibigay nito at ito ay tinatanggap natin sa kanya sa Sakramento ng Binyag.

1.5. Bakit ang Binyag ang pinakakailangang Sakramento? Sapagkat ito ay kinakailangan sa pagpasok sa langit upang makibahagi sa buhay ng Diyos.

1.6. Bukod sa Binyag , may mga sakremento pa bang kinakailangan upang maging ganap tayong Kristiyano? Mayroon: ang Sakramento ng Kumpil at Eukaristiya. Kasama ng Binyag tinatawag itong “Sakramento ng Pagtanggap” (Sacrament of initiation.)

1.7. Ano ang bunga ng Sakramento ng Pagtanggap? Sa pamamagitang ng mga Sakramentong ito:

• Pinalalaya tayo sa kapangyarihan ng kadiliman sa pagiging binyagan sa kamatayan at muling pagkabuhay ni Kristo, at

• Tinatanggap ang Espiritu na (1) ginagawa tayong mga inampong anak ng Ama, at (2) pinagiging kaanib tayo ng Simbahan, ang Bayan ng Diyos, (3) na kasama nating ipinagdiriwang ang paggunita ng Eukaristiya ng Misteryong Pampaskuwa ni Kristo. (KPK 1644)

2. ANO ANG DAPAT NATING GAWIN (CODE)

• Sariwain natin ang ating mga pangako sa Binyag na tatalikuran ang lahat ng kasalanan at itatakwil ang mga gawang masama. Sa ating pang-araw-araw na buhay ay ilayo natin ang ating sarili sa okasyon ng pagkakasala tulad ng masamang barkada, masasamang panoorin at babasahin, pandaraya, pagiging tamad, etc.

3. ANO ANG DAPAT NATING IPAGDIWANG (CULT)

• Ang paggunita sa Sakramento ng Binyag. Alamin ang petsa ng ating mga binyag at kung saang simbahan tayo nabinyagan. Sa tuwing anibersaryo ng ating Binyag ay gawin natin espesyal ang araw na iyon sa pamamagitan ng isang mabuting Kumpisal at Pagkokomunyon. Sa pagdiriwang ng Santa Misa tuwing Linggo ay panibaguhin natin ang ating pangako sa pamamagitan ng taos pusong pagpapahayag ng ating pananampalataya sa pagdarasal ng “Sumasampalataya Ako.”

TUGON NG PANANAMPALATAYA

1. Pinahahalagahan ko ba ang Sakramento ng Binyag bilang pinaka-unang Sakramento?

2. Batid ko ba ang ibig sabihin ng pakikibahagi sa pang-Diyos na buhay?

3. Paano ko maisasabuhay ang pang-Diyos na buhay na aking tinanggap sa Binyag?